箍牙第一步 - 剝牙

我一生人入面，最驚兩樣野，一係蟑螂，二係牙醫，最最最驚就係剝牙......

基本上身邊屋企人同男朋友都唔支持我去箍牙，覺得28歲都大個啦，唔應該無啦啦剝4隻健康牙齒，但係，我個口無空間比啲牙係到都冇辦法。

剝牙最驚既唔係剝牙個一下，係你知道將要去剝牙個緊張感，所以我盡可能都令到自己好忙，唔得閒諗黎緊要剝牙，再一路搵下好食既餐廳，食盡佢先！

但都終於到呢一日，去到診所得我一個人同幾個姑娘，但佢話搵唔到我Booking？？等左20分鐘，我個一刻只想快快手剝左佢。過左一陣姑娘叫我入房，醫生同我講上顎要剝第一小臼齒，下顎就剝第二小臼齒，等個嘴唔好內收得咁多，個陣我都聽唔明，乜唔係應該要對稱既咩？(事後睇返，的確係咁樣) 正係同牙醫確認可以對返齊啲牙就開始打麻醉藥了，今次我要剝左邊先。

打針個下真係好痛，但事到如今，我係咁幻想自己箍完可以自信咁笑，點都會比以家靚，咁就打完針。牙醫check 下我啲牙肉仲有冇感覺，之後佢就拎個夾去剝，大約1分鐘 (？)，佢話已經剝左上面個隻，會唔會太快...... 如事者，過多陣，下面個隻都KO左，比想像中快，出去拎埋止痛藥就返去了。

唔知係咪兩個隆唔係對稱，咬唔實塊紗布，用左2.5鐘先止到血，其間不斷冰敷都可以加速止血。極力建議大家食飽左先去剝牙，因為我朝早食左隻蛋就去左剝，止完血都已經3點，係超級肚餓，而且牙醫比既止痛藥都係飽肚服，所以我都冇食到牙醫開既藥，食左必理痛特效止痛藥 (可空肚服)。夜晚我已經係到打邊爐，剪碎左啲食物，容易啲咬碎，夜晚補左粒止痛藥就已經搞店。我覺得經痛仲痛好多😂

呢幾日都未慣有個牙隆，每日都會問自己咁樣做係咪真係岩，有啲人箍完牙係樣衰左，面凹左入去，嘴唇薄左，睇到我真係好好好驚，因為我唔係暴牙嘴凸，條法令紋天生就比較深，剝完會更加明顯 (？) 但以家已經冇得返轉頭，可以做既就係有最壞既打算，然後同牙醫好好溝通。

最壞打算︰

- 醫美針灸法令紋

- 美容儀提拉

- lip filler (最最最壞打算，我見有牙醫可以將牙推返出黎令到嘴唇冇咁薄，但就可能出現黑三角問題)

改變一生的決定 - 箍牙

唔知大家係咪同我一樣，一直都覺得啲牙唔齊，細個冇箍，到大家有經濟能力就一直都好想箍但又唔敢去。

先同大家講下我既牙齒狀況，門牙唔齊，笑個陣唔可以露齒笑，大臼齒都對唔齊，有深咬情況。上顎智慧齒冇位生，卡住左係鼻竇，下顎智慧齒係水平阻生齒，仲係個骨入面。多年前已經用左開電動牙刷同牙線，但都避唔到蛀牙。隻大牙蛀到要打麻醉藥去補牙，一年後，同一隻牙竟然要用$15,000去杜牙根！？於是，我終於忍唔住決定去箍牙！

係決定箍牙到比錢都睇左好多blog，Youtube等等，幫我解答好多疑慮，所以我都希望比多個例子可以幫到大家，同紀錄低呢件改變一生既事，我冇寫blog既習慣，希望大家多多見諒。

8月去左第一個牙醫諮詢，佢話有兩個方案：可以唔剝牙做矯正，但就可能會哨牙；或者剝4隻小臼齒，面仔就會入少少，佢比我揀隱形牙箍 $50,000 或者傳統陶瓷牙箍$34,000。

第二個牙醫，佢係專做隱適美，佢叫我剝4隻智慧齒，話個4隻襯後生剝就快啲復原，然後成副牙向後拉，個嘴就唔會凹好多，但4隻智慧齒都要專科做，$10,000一隻，箍牙$50,000，$90,000起落樓。

第三個牙醫，佢唔相信隱適美，而且剝個4隻智慧齒有好大風險，覺得好地地冇事冇痛唔應該剝智慧齒，所以佢個方案同第一個牙醫係一樣，只係再貴啲，$50,000做傳統。

箍個牙比成10萬我就真係接受唔到，所以我就揀左第一個牙醫，用傳統牙箍剝4隻小臼齒。